“Yzyna ugratma merkezlerinde ýatan Türkmen watandaşlarymyz ne deport edilýär, ne-de Türkiýedäki Türkmen konsullugy tarapyndan olaryň halyndan habar alynýar”

“2022-nji ýylyň Noýabr aýynyň 18-ne, İstanbulda Türk polisiýasy tarapyndan saklanylyp, Nigde Yzyna Ugratma Merkezine getirildik. Biz gelenimizde, 2-3 sany türkmen bardy, ondan soň türkmenleriň sany köpelip başlady. İçerde ýaşaýyş şertleri gaty agyr, dogry-düzgün ýuwunup bolmayar. Ýuwunsaň-da sowuk suwa ýuwunmaly bolýaň. Hiç bir zada mümkünçilik berenoklar. Telefonda ýakynlaryň bilen gürleşmek isleseň hiç bir ýagdaýda gürleşmäge rugsat bermeýärler. Gündelik berýän naharlaryny iýer ýaly däl. Bir garnymyz dok, bir garnymyz aç gezýäris”.

“Öz kösenýän ýagdaýymyzy aýtmak üçin Türkmen Ilçihanasyna jaň edenimizde, telefonlaryna jogap berenoklar. İçerdäki sakçylardan birisi bize Ankaradaky Türkmen Ilçihanasynda işgäri diýip, Miralynyň nomerini berdi we oňa hem jaň edip, ýa bizi şu ýerden çykaryň, ýa-da deport ediň diýip ýagdaýymyzy düşündürip aýdanymyzda, Ýaraşowyň diýýän sözleri, bizi öz başyndan sowmak boldy. Soňa baka bize garşylyklaýyn gygyryp, sögünçli sözleri ulanyp başlady. Şondan soň, Miraly Ýaraşow biziň halymyzdan habar alyp bize kömek etmekden geçip, telefon jaňlara jogap bermän başlady we biz bolsa mejbur 7 aýdan soň 600 dollara adwokat tutup çykmaly bolduk”.

“Görülip otursa Türkiýedäki Türkmen Konsullugydyr ýa-da Ilçihanasy hiç bir işe ýaramaýan ekeni. İçerden çykanymyzdan soň Ýaraşowyň kim boldugyny bilip galdyk. Netijede, ol Türkiýedäki tutulan Türkmenlere jogapkär edilip bellenen Ilçihananyň resmi bolmaýan işgäri bolup çykdy”